Sjávarútvegsskóli GRÓ

Þjálfunarnám og námsstyrkir

Hið sex mánaða langa hagnýta þjálfunarnám Sjávarútvegsskólans er hannað til að mæta þörfum samstarfsstofnana og þeim nemendum sem veljast til þátttöku. Á hverjum tíma er boðið upp á allt að fjórar sérlínur/sérsvið sem nemendur skiptast á eftir hlutverki og sérfræðiþekkingu þeirra í heimalandinu. Sérsviðin eru: stofnmat og veiðarfæri (ARAM), gæðastjórnun í fiskiðnaði (QMFHP), sjálfbært fiskeldi (SAq), og stefnumótun og veiðistjórnun (FPM). Nemendur eru allt fagfólk í sínu heimalandi og starfa í lykilstofnunum við stjórnun, eftirlit, og rannsóknir tengdum sjávarútvegi og fiskeldi. Allir nemendurnir eru með að lágmarki fyrstu háskólagráðu, en margir hafa lokið meistara eða doktorsnámi og hafa að lágmarki 2 ára reynslu. Sérfræðingar frá samstarfsstofnunum á Íslandi sem og frá sjávarútveginum koma að kennslu og leiðbeiningum einstaklingsverkefna hjá Sjávarútvegsskólanum og einnig eru mörg sjávarútvegsfyrirtæki heimsótt til að veita nemendum innsýn inn í þá miklu þróun sem þar hefur átt sér stað. Sérstakt átak er í gangi sem miðar að því að fá nemendur til að koma með gögn frá sínu heimalandi sem þeir vinna með í einstaklingsrannsóknum. Hafrannsóknastofnunin hýsir og sér um framkvæmd Sjávarútvegsskólans samkvæmt þjónustusamningi við GRÓ miðstöð um þróunarsamvinnu, en Hafrannsóknastofnunin hefur að auki umsjón með tveimur af fjórum sérlínum; stofnmatslínu og sérlínu á sviði sjálfbærs fiskeldi. Hinar sérlínurnar eru í umsjón Háskólans á Akureyri (fiskveiðistjórnun og stefnumótun) og Matís (gæðastjórnun í fiskiðnaði). Á Hafrannsóknastofnun sjá Dr. Theódór Kristjánsson, sérfræðingur á Ferskvatns- og eldissviði, og Dr. Warsha Singh, sérfræðingur á Uppsjávarsviði, um sérlínurnar sjálfbært fiskeldi og stofnmat. Sérlínan um gæðastjórnun í fiskiðnaði er stjórnað af Margeiri Gissurarsyni hjá Matís, og fiskveiðistjórnunalínan er í höndum Hreiðars Þórs Valtýssonar á Háskólanum á Akureyri. Þetta var síðasta starfsár Margeirs en hann hefur leitt sérlínuna til margra ára og kunnum við honum bestu þakkir fyrir samstarfið. Yfirmenn sérlína Sjávarútvegsskólans mynda fagráð skólans ásamt Dr. Hrefnu Karlsdóttur frá SFS, en fagráðið hefur m.a. umsjón með faglegum efnistökum, leiðbeinendum, og lokaverkefnum nemendanna í sex mánaða þjálfunarnáminu, og eru forstöðumanni til ráðgjafar um allt starf Sjávarútvegsskólans.
Rannsóknarmiðstöð fiskeldis í Færeyjum, FIRUM, hefur komið að kennslu og leiðbeiningum á fiskeldislínunni síðustu árin. Það góða samstarf hélt fyrstu mánuðina 2025, en frá og með haustinu hefur það samstarf minnkað mikið. Samstarfið við FIRUM hefur haft mjög jákvæð þróun á sex-mánaða þjálfunarnáminu og styrkir mjög sérlínuna um Sjálfbært fiskeldi.

^{Mr. Xavier Vincent sérfræðingur fiskimála hjá Alþjóðabankanum og gestafyrirlesari hjá Sjávarútvegsskólanum ásamt nemendum.}

Námskeið á Íslandi

Sjávarútvegsskólinn hefur verið með stutt námskeið fyrir samstarfsaðila á Íslandi. Í júní kom sendinefnd fá Kyrrahafsríkjum í þriggja daga heimsókn. Í sendinefndinni voru m.a. sjávarútvegsráherrar Palau og Papúa Nýju Gíneu ásamt ráðuneytisstjóra auðlindaráðuneytis á Salómon eyjum en einnig voru fulltrúar Alþjóðabankans í Kyrrahafi með í för. Markmið heimsóknarinnar var að kynna sér fiskveiðistjórnun og virðiskeðjur í sjávarútvegi ásamt því hvernig stjórnvöld styðja við þróun sjávarútvegs með rannsóknum og eftirliti.

Þátttaka Sjávarútvegsskólans á alþjóðlegum ráðstefnum

Mikilvægur liður í starfi Sjávarútvegsskólans er þátttaka í alþjóðlegum ráðstefnum þar sem fjallað er um sjávarútveg í þróunarlöndum. Stuðningur við fyrrum nemendur skólans miðar að því að gera fyrrum nemendum kleift að kynna rannsóknir sínar á alþjóðlegum ráðstefnum, enda ýtir það undir rannsóknir í sjávarútvegi og styrkir tengslanet nemenda.
Julie Ingham tók þátt í fundi um kynjajafnrétti í sjávarútvegi á vegum skrifstofu UNESCO í Gana. Jafnrétti kynja hefur í auknu mæli fengið athygli innan þróunarsamvinnu og skoðaði fundurinn sértaklega hvernig kynlíf er notað í viðskiptum með fisk, sérstaklega þegar samkeppni um kaup á fisk á löndunarstöðum er mikil. Þátttakendur voru einkum starfsfólk stjórnvalda, fólk úr þróunaraðstoð, og frjálsum félagasamtökum sem láta sig málefnið varða. Fundarfólk var sammála um að þörf sé á auknum rannsóknum á því valdaójafnvægi sem ríkir hjá konum gagnvart körlum í sjávarútvegi í fátækustu löndunum.